نبات البامبو والخرز الأزرق..

فكرت كيف أقدر أزين هذي المزهرية الشفافة مع البامبو... وعجبني لون هذا الخرز الأزرق والفراشات.. ونفذت هذا التزيين.. خطواتي مصورة:

مزهرية (زجاجة) .. نبات البامبو (متوافر في كل محلات الزهور).. عقد خرز أزرق لامع.. فراشات للزينة.. مسدس الشمع..

أول شي ثبت طرف العقد على عنق الزجاجة بالشمع.. ولفيته عدة مرات كما في الصورة3.. وثبت نهايته (الصورة4)..

بعدين قمت بتثبيت عقد ثاني على طرف الحلقة اللي سويتها ونزلت شوي منها .. وثبت الطرف الثاني على الحلقة عشان يطلع الشكل اللي في الصورة 3..

لزقت الفراشة في وسط الحلقة..

بعدين حطيت البامبو وحواليه الخرز عشان يثبت (مثل الصورة اللي في الأعلى)...(أنا ما أفهم وايد بطبيعة النباتات وهذي تجربة انا سويتها فما أعرف إذا البامبو يقدر يعيش في الخرز ولا لا... بسأل المختصين في هالأمور وبتأكد)..

وهذا الشكل النهائي... وبصراحة طلع اللون الأزرق وااااااااااايد روعة

^^

حلى الكاسات...لذيييذ

هذا سويت جفته في أحد المواقع وجربته.. وكان وااايد لذيذ.. وهذا تطبيقي للسويت و الخطوات اللي عملتها وصوريتها:

المقادير: بسكوت دايجستيف.. 2 قشطة.. ظرف دريم ويب.. ملعقتين سكر ناعم (أو حسب الرغبة).. القليل من الحليب الطازج.. حبتين مارس.. والمفروض أحط 10 حبات كيري بس أنا ما أحبه وايد حطيت بس 5حبات..

الطبقة (1): نغمس البسكويت قليلاً في الحليب البارد.. نكسره و نوزعه في الكاسات..

الطبقة (2): نحط ظرف الدريم ويب و1 قشطة و السكر الناعم و جبن الكيري مع بعض ونخلطهم بالخلاط الكهربائي إلى أن يمتزجون ويصبحون خليط متجانس ومتماسك شوي.. ونوزعه في الكاسات على البسكويت

الطبقة (3): نحط المارس و 1 قشطة على النار ونحرك إلى أن يذوب المارس ويختلط مع القشطة مثل الشكل، ونصبه على الطبقة الثانية..

للتزيين: نطحن شوي من البسكوت ونخليه وايد ناعم .. ونرشه على الوجه..

^^.. و صحتين وعافية ..^^

^^

اكسسوارات للشعر من صنع إيدي..^^

هذي تجربتي في عمل اكسسوارات بسيطة وسهلة للشعر(قباضات) ... و مع ذلك حسيت بالفرحة يوم لبستها لأنها من صنع إيدي.. وهذي تجربتي مصورة:

احتجت ورود للزينة (أي نوع من الورود على حسب ذوقنا).. قباضات بلاستيكية غير مزينة (يُفضل أنه تكون سودة بس ما حصلت فاشتريت لون أبيض).. كريستالات صغيرة.. مسدس الشمع..

الشكل (1): لزقت الوردة الذهبية بالشمع على القباضة ولازم نضغط عليها بقوة إلى أن يجف الشمع.. بعدين حطيت الوردة الثانية فوقها ولزقتها .. وفوقها كريستالة في الوسط ... و (الصورة 4) شكلها النهائي..

الشكل (2): لزقت الورود الثلاثة على استقامة وحدة.. والصور اللي فوق توضح الخطوات.. (الصورة 4) شكلها النهائي..



أتمنى أنه تجربتي الأولى تكون عجبتكم .. وإن شاء الله المرات القادمة يكون فيها إبداع أكثر..
^^

طريقة حلوة وبسيطة..

هذي طريقة حلوة وغير مكلفة في ترتيب اكسسوارات الشعر (القباضات).. حصلت هالسلة الفاضية و ما كان لها فايدة ففكرت اني احط عليها (القباضات) .. وطلع شكلها حلو ومرتب، وهذي طريقة اللي سويته بالصور:

احتجت سلة متوسطة الحجم (أو على حسب المتوفر) .. مسدس شمع .. عقدين من الخرز لونين(لازم يكون طويل شوي) وخرز حبات مفرقة.. ورود مخمل لونين..

أول شي سويت حلقة على يد السلة وثبتتها بمسدس الشمع.. و مديت العقد إلى منتصف السلة وثبتته... وعقب مديت العقد إلى الجهة الثانية من يد السلة وسويت حلقة وثبتتها بالشمع.. فبيطلع العقد مثل الزينة اللي تكون مايلة،، والجهة الثانية نسوي نفس الشي..

سويت حلقة ثانية باللون الثاني من العقد وهذا حق يد السلة وثبتتها بالشمع،، وبعدين لفيت العقد على يد السلة كاملة(الصورة 2).. وثبتيت نهايته على الطرف الثاني من يد السلة.. وبيطلع الشكل مثل الصورة 4..

وبعدين حطيت الورود على يد السلة من الجهتين.. وفي وسطها.. وعلى أجزاء مختلفة منها.. ولزقت الخرز المفرق على شكل معين.. ونقدر نتفنن في التزيين مثل ما نحب ونبدع في الأشكال.. ونحط تزيين ثاني غير اللي سويته..

و هذا هو الشكل النهائي وهذي الطريقة اللي حطيت فيها (القباضات)..
أتمنى أنه هذي الفكرة البسيطة تنال إعجابكم.. وتطبقونها وبشكل أحلى..

^^

رايس كرسبس بالمارس

حبيت أعرض طريقة سويت وايد سهلة وما تحتاج وايد أغراض... وطعمها خيااااااااااااااااال ولذيذة وااايد، وهذي الخطوات مصورة:

المقادير نقدر نغير فيها على حسب الكمية، أنا استخدمت 5 مارس، ربع زبدة، و كمية متوسطة من الرايس كرسبس، قوالب الكيك الورقية..

نحط الزبدة على النار حتى تذوب ، وبعدين نقطع المارس ونحطه فوق الزبدة، ونحرك حتى يمتزج الخليط (مثل اللي في الصورة)..


نحط الرايس كرسبس على خليط المارس بالتدريج، ونحرك حتى نشعر أنه صار متماسك ويمكن تشكيله، وبعدين نخليه شوي يدفا ونقدر نمسكه، ونبدأ نكور الخليط باليد (مثل ما نكور العجين)، ونحطه في قوالب الكيك الورقية... وللتزيين: نقطع المارس على شكل شرائح ونحطه على الوجه..



وهذي النتيجة... بالهناء والعافية.. ^^

التقطتها في الجامعة... ^^

{ فراشة الحقل طيري في كل روضٍ نضير ،*

{ سبحان رب البرايا حباك لون الزهور ,~

{ فـصرت آية حسن صنع العلي القدير*،

{ فراشة الحقل رفي على الربا لا تكفي ,~

المفن كيك.... ^ ^

أنا وايد أحب المفن كيك... بس ما أعرف كيف طريقته... فجربت الخلطة الجاهزة... وطلعت الكيكة حلوة... هذي الخطوات مصورة... والنتيجة مفن لذيييييييييييييذ:

..علبة خلطة المفن الجاهزة (أنا استخدمت بيتي كروكر) .. بيضتان .. ربع كوب زيت .. ثلاثة أرباع كوب ماء..

.. نحط المكونات كلها مع بعض ..

نخلطها بالخلاط الكهربائي إلى أن تمتزج الخلطة وتصبح مزيجاً متجانساً ومتماسكاً قليلاً..

...نصب الخلطة في القوالب ويُفضل أنه القوالب تكون حديدية عشان تطلع الكيكة مرتبة ودائرية.. بس ما كانت متوفرة عندي فحطيتها في أوراق الكيك... بعدين نحطها في الفرن على درجة حرارة 200 درجة سيليزية... لمدة 18 - 21 دقيقة....

وبعدين نطلع الكيكة من الفرن ونخليها تبرد شوي...

..وبالهناء والعافية..

^^